विश्वकप फुटबलको क्वार्टरफाइनलमा पोर्चुगल र मोरोक्कोले प्रतिस्पर्धा गर्दैछन् । शनिबार (आज) राति ८ः४५ बजे मोरोक्को र पोर्चुगलबीचको खेल हुँदैछ ।

कतारको अल थुमामा रंगशालामा हुने खेलमा मोरोक्कोलाई पराजित गर्दै सेमिफाइनलमा पुग्ने लक्ष्यमा पोर्चुगल रहेको छ । विश्व चर्चित खेलाडी क्रिस्टियानो रोनाल्डोको कप्तानीमा पोर्चुगलले विश्वकप खेलिरहेको छ ।

विश्वकप फुटबलमा उपाधि जित्न नसकेको पोर्चुगल यो पटक भने उपाधि जित्ने लक्ष्यमा छ । मोरोक्कोलाई रोनाल्डोको डर छ । सुपर स्टार खेलाडी रोनाल्डोलाई रोक्ने रणनीति मोरोक्कोको रहेको छ । तर यसअघि प्रिक्वार्टरफाइनलमा स्वीट्जरल्यान्डविरुद्धको खेलमा रोनाल्डो सुरुआती एघारमा परेका थिएनन् । उनको स्थानमा गोन्सालो रामोसले खेलेका थिए । रामोसले उत्कृष्ट खेल्दै ह्याट्रिक गोल गरे । उनले गरेको त्यो ह्याट्रिक जारी विश्वकपकै एक मात्र ह्याट्रिक गोल हो ।

पोर्चुगल

पहिलो पटक उपाधि जित्दै इतिहास बनाउने लक्ष्यमा रहेको टिम हो, पोर्चुगल । पोर्चुगलले प्रिक्वार्टरफाइनलमा स्वीट्जरल्यान्डलाई ६–१ गोलअन्तरले पराजित गर्दै क्वार्टरफाइनलमा प्रवेश गरेको थियो । यो जितमा रामोस नायक सावित भए ।

समूह ‘एच’ को विजेता बन्दै पोर्चुगल विश्वकपको नकआउट चरणमा प्रवेश गरेको थियो । आफ्नो पहिलो खेलमा घानालाई ३–२ गोलले पराजित गरेको पोर्चुगलले दोस्रो खेलमा उरुग्वेलाई २–० ले हराएको थियो । तर समूह चरणको आफ्नो अन्तिम खेलमा पोर्चुगल दक्षिण कोरियासँग २–१ गोलले हारेको थियो ।

मोरोक्को

मोरोक्को इतिहास बनाउँदै विश्वकपको क्वार्टरफाइनलमा पुगेको टिम हो । मोरोक्कोले प्रिक्वार्टरफाइनलमा २०१० को विश्वकप विजेता स्पेनलाई पेनाल्टी सुटआउटमा ३–० ले पराजित गर्दै क्वार्टरफाइनलमा स्थान बनाएको थियो ।

पोर्चुगललाई पराजित गर्दै मोरोक्को सेमिफाइनलमा पुग्ने लक्ष्यमा छ ।

समूह चरणको आफ्नो पहिलो खेलमा क्रोएसियासँग गोलरहित बराबरी खेलेको मोरोक्कोले दोस्रो खेलमा बेल्जियमलाई २–० गोलले पराजित गरेको थियो । तेस्रो खेलमा क्यानडालाई २–१ गोलले पराजित गर्दै मोरोक्को समूह ‘एफ’ को विजेता बनेको थियो ।