जर्मनीले कतारमा जारी विश्वकप फुटबलको समूह ‘ई’ को खेलमा स्पेनविरुद्ध बराबरी खेल्दै अंक बाडेको छ ।

कतारको अल बेत रंगशालामा १–० गोलले पछि परेको जर्मनीले १–१ गोलको बराबरी खेलेको हो । खेलको ४०औँ मिनेटमा जर्मनीका एन्टोनियो रुडिगरले हेडर गोल गरे । तर त्यो गोलले मान्यता पाएन । भिडियो एसिस्टेन्ट रेफ्रि (भीएआर) ले रुडिगर अफसाइड भएको संकेत दिए । योसँगै जर्मनीले स्पेनविरुद्ध १–० गोलको अग्रता बनाउने मौका गुमाएको थियो ।

खेलको ६२औँ मिनेटमा अल्भारो मोरटाले गोल गर्दै स्पेनलाई १–० को अग्रता दिलाए । खेलको ८३औँ मिनेटमा निक्लस फुलक्रुगले गोल गर्दै जर्मनीलाई १–१ को बराबरी दिलाए ।

यो बराबरीसँगै जर्मनीको पनि विश्वकपको नकआउट चरणमा प्रवेश गर्ने सम्भावना कायमै रहेको छ । समूह ‘ई’ मा दुई खेलबाट चार अंक बनाएको स्पेन शीर्ष स्थानमा रहेको छ । दोस्रो स्थानमा तीन अंकसहित जापान रहँदा तेस्रो स्थानमा रहेको कोस्टारिकाको तीन अंक छ । पुछारमा रहेको जर्मनीको एक अंक भएको छ । अब जर्मनीले समूह चरणको अन्तिम खेलमा कोस्टारिकासँग खेल्नेछ । यता, स्पेनले भने जापानसँग खेल्नेछ ।