बेल्जियमले विश्वकप फुटबलमा आज (आइतबर) मोरोक्कोसँग प्रतिस्पर्धा गर्दैछ । समूह ‘एफ’ मा रहेको बेल्जियमले मोरोक्कोविरुद्ध लगातार दोस्रो जितको खोजिमा हुनेछ ।

बेल्जियम र मोरोक्कोबीचको खेल कतारको अल थुमामा रंगशालामा नेपाली समयअनुसार ६ः४५ बजे खेल सुरु हुनेछ ।

बेल्जियमले पहिलो खेलमा क्यानडालाई १–० गोलले पराजित गरेको थियो । यता, मोरोक्को भने आफ्नो पहिलो खेलमा क्रोएसियासँग गोलरहित बराबरी खेलेको थियो । मोरोक्कोविरुद्ध जित निकाल्दै विश्वकपको प्रि–क्वार्टरफाइनलमा पुग्ने आफ्नो सम्भावनालाई बलियो बनाउने लक्ष्यमा बेल्यिजम रहेको छ ।

बेल्जियम र मोरोक्कोबीच अहिलेसम्म तीन पटक भेट भएको छ । सन् १९९४ मा भएको विश्वकपमा बेल्जियम र मोरोक्कोबीच भेट भएको थियो । जुन खेलमा मोरोक्कोलाई बेल्जियमले १–० गोलले पराजित गरेको थियो । १९९९ मा भएको मैत्रीपूर्ण खेलमा बेल्जियमले मोरोक्कोलाई ४–० गोलले हराएको थियो । तर २००८ मा भएको मैत्रीपूर्ण खेलमा भने मोरोक्कोसँग बेल्जियम ४–१ गोलले हारेको थियो ।